Pavarësia e Kosovës!

Popull Shqiptarë,

Edhe pak orë na ndajnë nga dita e madhe e shpalljes së Pavarësisë së Kosovës. Përkrah Vlorës së 28 Nëntorit 1912 do të renditet edhe Prishtina e 17 Shkurtit 2008. Këto dy data historike do të shënojnë ditën e shtetësisë shqiptare. Janë kurorëzim i përpjekjeve, gjakut dhe sakrificave tona shekullore për të qenë të lirë, të pavarur dhe të barabartë në mesin e popujve të barabartë!

Me këtë akt po korrigjohet një pjesë e padrejtësisë ndaj kombit shqiptar. Kjo është përmbushja e gjysmës së ëndrrës shqiptare për bashkimin e trojeve të tyre etnike, të copëtuara padrejtësisht nga grabitçarët dhe me përkrahjen e ish fuqive të mëdha. Sidoqoftë, na mban shpresa se ky moment do të shënoi edhe fillimin e korrigjimeve të padrejtësive historike në hapësirat e Ballkanit, fillimi i fundit të zezonave mbi kurrizin e popullit shqiptar dhe trojeve të tij etnike!

Numërimi i çastit të shumëpritur tashmë ka filluar... Kudo në Kosovë ndjehet atmosfera festive. Qytetet janë skuqur nga flamujt kuq e zi. Zemrat, mendjet dhe sytë e të gjithë shqiptarëve, kudo që gjenden, janë kthyer nga Kosova. Festa e madhe veçsa nuk ka marr jehun deri në kupë të qiellit. Edhe dielli po e ngrohë Kosovën dhe sikur thërret: Gëzohuni shqiptarë!